Hópferð til Kosta Ríka

Fljúgum síðdegis frá Keflavík til Toronto með Icelandair. Eftir landamæraeftirlit förum við saman með flugvallarlestinni á hótel nálægt flugvellinum. Kvöldið er frjálst til að slaka á eða kynnast Toronto.

Förum snemma saman út á flugvöll. Hægt er að kaupa léttan morgunverð á hótelinu en eftir innritun eru margir veitingastaðir sem bjóða upp á mat. Fljúgum með WestJet til borgarinnar Liberia í norðvesturhluta Kosta Ríka. Flugið tekur um 5 klst. og við lendum um kl. 13:00.

Hittum leiðsögumanninn okkar á vellinum og keyrum þaðan á spahótelið. Hótelið er í frábæru umhverfi með fiðrildagarð og heitum pottum og laugum. Borðum saman kvöldverð á veitingastað hótelsins.

Við dveljum í þrjár nætur á Rincón de la Vieja-svæðinu áður en haldið er áfram til La Fortuna.

Gönguferð dagsins er að fossum sem eru nálægt hótelinu okkar. Einstök náttúrufegurð á leiðinni með fjölbreyttu dýra- og plöntulífi. Höfum góðan tíma til að slaka á við fossinn áður en haldið er aftur að hótelinu.
​Síðdegis slökum við á í þessu fallega umhverfi hótelsins.

Njótum morgunins á hótelinu okkar en fyrir þau sem vilja þá tökum við daginn mjög snemma og förum í fuglaskoðun. Göngum um svæðið þegar fuglalífið er að taka við sér. Auðvitað viljum við reyna að sjá túkana. Eftir gönguna þá er tími til að slappa aðeins af en síðan förum við um hádegi í heimsókn til fjölskyldu í þorpinu til að læra um matgerðarlist í Kosta Ríka. Við eldum saman og hittum innfædda. Algjört Pura Vida og frábær matur sem við fáum að borða. 
​

Þennan dag erum við að færa okkur á milli svæða þannig að þetta er lengsti keyrsludagurinn en við ætlum líka að upplifa margt á leiðinni. 
​
Á leiðinni stoppum við á svæði sem er þekkt fyrir að vera með mikið af letidýrum og förum í göngutúr til að finna þau. Ótrúleg upplifun að sjá þessi einstöku dýr í sínu náttúrlega umhverfi. 
Förum í hádegismat á litlum sveitabæ þar sem hægt er að smakka hefðbundinn mat frá svæðinu og auðvitað að drekka gott kaffi á eftir.

Eftir það keyrum við í átt að Arenal-svæðinu og bænum La Fortuna þar sem við gistum í þrjár nætur á frábæru spahóteli. Algjör paradís með útsýni að eldfjallinu og með frábærar sundlaugar og spa. Kvöldið tekið á hótelinu eftir langan dag.

Það er mögnuð upplifun að ganga yfir regnskóg en í dag förum við þar sem er búið að búa til brýr og göngustíga fyrir ofan regnskóginn. Einstök lífsreynsla sem mun aldrei gleymast. Þetta er ekki erfið ganga og mikilvægt er að vera með sjónauka til að sjá allt dýralífið sem verður  fyrir neðan okkur.

Frjáls eftirmiðdagur annað hvort á hótelinu eða í bænum La Fortuna þar sem er að finna marga bari og skemmtilegar búðir þar sem hægt er að versla.

Heimsækjum sjálfbæran sveitabæ þar sem þau rækta þjóðardrykk Kosta Ríka: kaffi. Landið er þekkt fyrir að rækta bestu kaffibaunir í heiminum. Við fáum að smakka mismunandi kaffi en fyrir þau sem drekka ekki kaffi þá eru ræktaðar kakóbaunir á bænum líka. Þannig náum við að blanda saman kaffi og súkkulaði. Við förum líka í sérstaka súkkulaðikynningu og smökkum mismunandi gerðir. 
Frjáls eftirmiðdagur á Arenalsvæðinu.

Höldum vestur á bóginn og keyrum í átt að Kyrrahafinu þar sem við gistum síðustu þrjár næturnar í Kosta Ríka. Á leiðinni stoppum við í Centro de Rescate Las Pumas, en það er dýraathvarf.

Þýsk hjón hófu að bjarga dýrum á þessu svæði um 1960 og síðan hefur það undið upp á sig. Hjónin eru bæði fallin frá en stofnunin heldur áfram. Heillandi staður sem manni líður betur eftir að hafa heimsótt.

Keyrum síðan áfram í átt að hótelinu okkar í Tamarindo sem er bær við ströndina. Tamarindobær er þekktur fyrir líflegt mannlíf, góða veitingastaði og skemmtilega bari. Kvöldið notum við til að slappa af eða fara út á lífið.

Afslappandi dagur á ströndinni eða við sundlaugarbakkann á hótelinu. Það er einnig möguleiki að fara í köfun eða eitthvað sem ykkur langar til.

Sigling á Kyrrahafinu í snekkju með ferðafélögum þínum. Förum að morgni á snekkju í stuttri fjarlægð frá hótelinu. Borðum hádegisverð á bátnum og auðvitað verður barinn opinn.

Hægt að stinga sér til sunds og snorkla í kristaltæru Kyrrahafinu. Um kvöldið er sameiginlegur kvöldverður þar sem við erum því miður að kveðja þetta einstaka land.

Hægt að njóta morgunsólarinnar og fara í sjóinn því flugið er ekki fyrr en eftir hádegi. Tekur um klukkustund að keyra á flugvöllinn þar sem við fljúgum með WestJet til Toronto. Flugið tekur um fimm tíma.

Lendum að kvöldi í Toronto og förum á hótel nálægt flugvellinum til að gista í eina nótt.

Dagsferð að Niagarafossum fyrir þá sem velja það. Frábær ferð þar sem við borðum hádegisverð í um 150 metra hæð yfir fossunum. Smökkum hlynsíróp og förum í kynningu á ísvíni.

Frjáls tími í litlum bæ sem heitir Niagara-on-the-Lake. Fyrir þau sem vilja versla þá er möguleiki að koma með og fara í verslunarmiðstöð með útsöluverslunum og eyða deginum þar. Fljúgum heim um kvöldið með Icelandair

Lendum snemma að morgni í Keflavík eftir frábæra ferð til Kosta Ríka.