Í grein sem birt var á mbl.is þann 17. febrúar 2026 (Íslendingarnir snúa heim í dag) er vísað til mín og mér eignuð ummæli í tengslum við samskipti við Heimsferðir um fyrirhugaðar ferðir til Kúbu.

 

Ég tel mikilvægt að leiðrétta þá framsetningu sem þar kom fram. 

 

Öll samskipti mín við Heimsferðir í maí 2025 voru skrifleg  og aðeins í tölvupóstum dagana 24., 27. og 30. maí. Þar setti ég fram upplýsingar um aðstæður á vettvangi á þeim tíma, meðal annars um aukið rafmagnsleysi, skort á nauðsynjavörum og almennar áskoranir sem gátu haft áhrif á skipulag og öryggi ferðamanna. Markmið mitt var að deila reynslu okkar af starfi á staðnum og vekja athygli á raunverulegum rekstrar- og innviðavanda á Kúbu. 

 

Í greininni eru mér hins vegar eignuð ummæli sem ég hef aldrei látið falla. Ég hef aldrei haldið því fram að ég væri á nokkrum bannlista né notað það orðalag sem þar er haft eftir mér. Slíkar tilvísanir eiga ekki við mig og endurspegla ekki þau skriflegu samskipti sem áttu sér stað. 

 

Í samskiptum eftir birtingu greinarinnar hefur Tómas J. Gestsson staðfest að um misskilning hafi verið að ræða og að hann hafi ruglað mér saman við annan einstakling sem heimsótti skrifstofu þeirra. Þær fullyrðingar sem tengdar voru við mitt nafn eiga því ekki við mig.

 

Ég hef starfað við skipulagningu ferða til Kúbu frá árinu 2017 og lagt ríka áherslu á ábyrga og faglega ferðaþjónustu. Allar ábendingar sem ég hef komið á framfæri hafa snúist um hagsmuni ferðamanna og raunverulegar aðstæður á vettvangi.

 

Þar sem greinin nafngreinir mig hefur þessi rangfærsla verið tengd við mitt nafn í opinberum leitarniðurstöðum. Það er mikilvægt fyrir mig, bæði persónulega og faglega, að réttar upplýsingar liggi fyrir.

 

Þessi yfirlýsing er sett fram til að tryggja að staðreyndir málsins séu skýrar og að misskilningur verði leiðréttur.

​

Virðingarfyllst,

Juan Carlos Suarez Leyva 

Eigandi / Kúbuferðir / 2Go Iceland Travel / Go ehf. 

​